Carita Bahasa Sunda : Saung Sawah
Asalamualaikum , hayu ah urang ngalalakonkeun ieu carita anu dilansir tina https://chaklyraflesia.blogspot.com, lamun urang menang ide anu sae manga canak mun nu awon mah teu kenging… yuk prung!
Harita umur kuring can nincak 8 taun, sakola ge kakara kelas 2 sakola dasar. Sakola kuring kawilang deukeut ti padumukan ngan ukur mudun ka beh kaler mapay jalan aspal. Puguh we ari inditmah asa tereh, abong jalana mudun. Ngan lamun balik asa cape kacida tur leuseuh. Mulang sakola can manggih dahar jaba tos mikir diajar.
Saprak sakola dasar kuring jadi boga batur. Mun indit ka sakola, mindeng kuring disampeur ku babaturan boh awewe boh lalaki. Puguh we nyalampeur da imah kuring jajalaneun ka sakola. Keur dahar keneh ge ditarungguan bari acan disapatu-sapatu acan.
Balik sakola pon kitu deui. Kusabab babaturan sok arembung balik jalan aspal bari nanjak, sok mapay jalan motong ka sisi sawah nu disebutna jalan Peundeuy. Eta jalan puguh we beda jeung jalan aspal rada iuh ngan rada hieum ku tutuwuhan di sisi solokana.
Kuring jeung babaturan mindeng eureun heula di saung sawah
Haji Kayah bari tetembangan. Tembangnamah naon we nu meunang ti sakola
diajarkeun ku guru da haritamah can loba artis jeung band-band jiga kiwari. Aya
pupuh, lagun kaulinan, lagu sunda atawa lagu wajib nasional.
Hiji mangsa kuring keur dariuk di saung sawah nu kabeneran harita keur halodo dipelakana jagong, aya sora nu ngagorowok ti beh kidul.
“Hey, barudak ulah ngararuksak! Eta jagong keur mimiti Barudak tinglalieuk bari bingung kudu kumaha ngawalerna. Pedah aya hiji budak nu katenjo keur ngompol ka lebah jero kebon jagong. Buru-buru we kuring nyalukan Iwan nu keur di tengah kebon.
“Iwan, buru ngompolna! Tuh aya Haji Amat nenjoeun ti katebihan. Bisi duduhkeun keur ngaruksak.” Ceuk kuring
Iwan gura-giru bijil ti tengah kebon jagong. Ti beh kidul Haji Amat lempang bari mamawa parang ngadeukeutan tempat kuring dariuk di saungna. Meureun manehna rek nyacar tutuwuhan disisi kebona.
“Keur naraon hidep di dieu? Lain geura marulang geus beurang pan bagean sarakola agama!” pokna.
“Nuju reureuh Pa Haji, ngiring calik!” ceuk kuring tamba era.
“Ari Iwan tos naon di tengah kebon?” Haji Amat nanya.
“He..he.. wangsul kahampangan, Pa Haji.” Tembal Iwan bari surungah-serengeh eraeun.
“Oh, manawi ngararuksak! Pek bae bade rareureuhmah, tapi kade ulah ngaruksak malihan kedah ditingalian bilih aya nu ngaruksak batur! Atawa aya nu ngalaan jagongna.” Haji Amat sasauran ka sarerea.
“Muhun, Pa Haji Insya Allah!” Jawab kuring babarengan.
Ti harita kuring jeung babaturan asa dibere hate diwidian rareureuh atawa ngagunakeun saung. Kuring jeung babaturan mindeng we caricing di eta saung bari tetembangan atawa kerja kelompok ngerjakeun tugas sakola. Mun make eta saung teh, tangtu wae nggeusna dibareresihan deui.
Hiji poe, geus leuwih saparapat jam can bubar wae sakola teh. Kuring asa rada teu ngarareunah, tapi kuring embung katinggaleun pelajaran. Sanggeus nulis PR, barudak dititah caricing heula ulah waka marulang. Ibu guru masihan panalek paheula-heula uih, anu bisa ngajawab soal tiasa uih.
Soal bubuka asa babari pisan, nya bisa kajawab ku kuring. Kusabab bisa ngajawab eta panalek, kuring tiasa ka luar pangheulana. Biasana kuring sok patunggu-tunggu batur nu can kaluar, harita mastaka asa kacida abotna. Ningali jalan aspal nu ngabentrang panas, mengkol we ka jalan Peundeuy.
Sampean asa rarampeolan diangge leumpang teh. Mapay jalan anu biasa diliwatan kuring. Teu kungsi lila geus katnjo saung Haji Amat, maksudnamah rek reureuh. Mastaka nu nuju abot kacida ngarenjagna kumargi ningali kebon jagong aya jalma nu keur luak-lieuk mamawa bedog. Asa teu kaharti lamun rek panen dipiwarang nu gaduhna bari luak-lieuk kitu.
Kapaksa kuring ngintip ti katebihan, da asa katempuhan lamun eta kebon aya nu ngala jagongna. Nangtung tukangeun tangkal cau bari soca mah teras we ningali ka beh kidul. Eta jalmi ngamimitian ngala jagong ti juru anu hieum ku tatangkalan.
Teu kungsi lila kadangu sora nu ngagarebahan ti tukangeun awak kuring.
“Hoya....hoya....” Sora babaturan barareng bari tarik.
“Sut...sutttt!” Kuring nitah repeh. Atuh lalaki nu mawa bedog teh kaluar ti kebon bari mawa karung nu eusina jagong kira-kira lima siki.
“Aya naon nitah repeh?” Ceuk Iin.
“Itu tingali!” Ceuk kuring bari nunjuk lalaki nu kaluar ti kebon jagong.
Barudak miluan ngaharuleng. Bari bingung tur sieun aya jalma mamawa bedog jeung karung. Eta jalma leumpang nyampeurkeun barudak nu keur ngarobrol. Sugan teh rek nanya, atawa kukumaha tapi kalah perewis we leumpang nongtoyod muru rek meuntas ka cukangan leutik nu terusna ka jalan aspal
Ti beh kidul kabeneran aya Haji Kayah jeung salakina bari mawa pakakas jeung karung. Jiga nu rek manen jagong. Sanggeus maranehna tepi kacida reuwaseun nana ningali sababaraha tangkal jagong geus areuweuhan. Kuring jeung babaturan nyampeurkeun, terus nyarita nu sabenerna.
Carita kuring ka Haji Amat can anggeus aya sora nu menta tulung ti beh kaler. Kuring jeung balare nyampeurkeun eta sora. Nyampak teh lalaki nu tadi mawa bedog jeung karung nu kaluar ti kebon jagong keur ngagoler handapeun cukangan teu bisa hanjat. Manehna ragrag tina cukangan nu bobo.
Sang Hyang Widi mah maha kawasa. Kakara ge ngalalakon nu teu leres tos dipasihan walesanana. Haji Amat nulungan naekeun eta lalaki. Iin mawa bedogna nu ragrag. Kuring mawa karung nu ngagoler bari dibuka panasaran naon eta eusina. Seg teh bener we, kacuriga kuring. Manehna tos ngala jagong nu Haji Amat.
Lalaki eta ngaku sagala paripolahna, nyaeta ngala jagong ngan kagareuwahan ku barudak jadi teu ditulurykeun niat gorengna. Pa Haji Amat ngahampura eta lalaki sabab apaleun ka eta jalma keur susah saba’da dipecat tipagaweanana ti pabrik heler. Terus eta lalaki jangji moal ngalakukeun kasalahan nu sarua.
Haji Amat kacida bungaheunana, teu salah manehna ngawidian make saungna. Syukuran ka nu Maha Kawasa bari ngedalkeun hatur nuhun ka barudak. Barudak lalaki tuluy mantuan panen jagong. Kuring nu teu ngarareunah dianteurkeun ku Iin ka imah da karasa deui panyakitna. mung sakieu anu tias kapihatur,,,enying deui urang lanjutkeunana. wasslamualaikum wrwb